Heute Abend ziehen die Gestalten durchs Dorf

Am Frytig, em 21. Hornig, duen ich, s Hutzgüri, zämme mit em Schärmuuser, em Bott und myne beede Äierwyybli zum vieredryssigschte Mool in der jüngere Gschicht vo Rotheflue es paar Wyybervölcher und Bürschtli im Dorf under dr Rote Flue mi Uffwartig mache.

Öbben um die siibeni falle mir vom Weschte häär ins Dorf yy und marschiere schnuerstraks ufe Dorfplatz zue. Dört wäi mer emol luege, wär vo dene Rotheflüeher, wo nit bsuecht wärde, der Muet het, em Güri under d Auge z drätte.

Als Erschts gönge mir grad der Hof duruuf zmitts ins Bermuda-Drüü-egg zum Dennler Michi. S Hutzgüri isch scho ganz nervös, ändlich emol ufe Denndler z träffe. D Äierwyybli nimmts wunder, wiso är jetzt der Arm in der Schlinge het. Es wär wichtig, as er glyy wider voll im Saft isch, as d Red Rocks wenigschtens hinde wider ganz dicht sy.

Wyter goots underem Horn zue zum Daniela Gisin (Küng). Sie hets doch no gschafft, nach gfühlte 20 Joor Jommere z Rotheflueh es Huus z boue. Es syg wienes Häichoo, häig sy schynts gsäit. S Güri will hoffe, dass nach dere Bouerei a däm Rutschhübel no öbbis fürig bliiben isch, zum d Hutte fülle.

Im Bürgerschopf hinde sueche mer nocher dr Markus Lüdin und wäi syni Ornig go aaluege. Obwohl no e mänge Baum im Wald ummestoot, dänkt er ans Ufhööre. S letscht Mool häi mir no Gläägehäit, zum ihn als aktive Förschter bsueche. Käi Wind, käis Füür und käi Chäfer häi ihn dervoo abgholte, em Rotheflüeher Wald treu z blyybe. Mir sy gspannt, weeli Plän är für syni Pangsion het, är wird wohl no anders im Chopf ha als Briefmarke.

Au wenn sy käini Yhäimische syy, häis d Cheesi-Fraue emol verdient, vom Hutzgüri bsuecht z wärde. Mir wäi dur d Schyyben ynespienzle, öb ächt dä neu Laade würkli eso schön und modärn isch, wies immer häisst, und dr Mindeschtabstand vo de Produkt zum Booden überall yyghalten isch, will me jo jederzyt mues mit Hochwasser rächne. Villicht chönnte d Äierwyybli vor Ort au no grad der Läiterewaage fülle für e Nootvorroot im Oberloch.

Nochär gönge mer d Ruebgass uuf und d Ysegass ab richtig Unland hindere. Vor 20 Joor isch d Sarah-Jane nit dehäi gsii, wo mir uf Bsuech häi wölle. Jetzt wäi mir luege, öb mir daas Mool meh Glück häi und euse Super-Star nit grad neumen es Liedli am Trälleren isch. Apropos Trällere: Mir ghöören all Joor d Muusig vom Sarah-Jane-Fescht vo der Rythalle bis zu eus uufe. Aber yyglaade sy mer no nie worde. Den Äierwyybli würd s Ummeschäkere uf de Feschtbänk scho no gfalle. D Hündli söll si sicherhäitshalber im Huus loo.

An der Ammelerstrooss im Chlyy-Bärti-Huus wohnt der Frank Thommen. Der Seckelmeischter vo der Melioration het momentan e Huufe z due mit em Yytryybe vo den Are-Byyträg. Dr sälbständig Früehräntner-Unternähmer, aktiv Seniore-Turner und Maa für all Fäll chunnt sit Joore au als Baumwärter zum Ysatz.

Die neui olti Landstrooss hindere marschiere mer nocher zus Zimberhanse. Mir stosse mitem Ernst Erny
aa uf d Übergoob vo sym Gschäft. Das het der «Meck» bekanntlich nach 20 Joor im Boode ummenuele uf Buus übere vertschuttet. Mir wäi mitem zruggluege und es paar Anekdöötli us synere Zyt als erfolgryyche Gschäftsmaa ghöre.

Zum Dorf us gömmer nocher no zum gemäine Root Patrick Buess in d Rütsche hindere. Dört, wo der Winter no sym Name gerächt wird, füehrt är en Esel-Chüe-Gäissehof mit Diräktverchauf am Mischtstock aa. Uf der Gmäin het er momentan alli Händ voll z due – mir wäi ihn frooge, öb er öbbe no ufe Breesi spanyyflet. Näbebyy duet dr Chunde-Muurer öbbedie es Müürli muure oder süscht mitem Bagger im Bode ummenuudere.

So, das weeren also die Frauen und Manne, wo mir d Ufwartig mache. In der Zwüschezyt sött sich ummegsproche haa, as me denn joo nit mit leere Händ sött doo stoo, wenn s Hutzgüri chunnt. Mit edle roote Säft, Brautem, Brenntem und Gräuktem loot sich s Güri am schnällschte lo besänftige.

Und dir wüsset jo: Öbs huudlet oder Chatze haaglet – s Hutzgüri blybt immer voruss. Also denn, bis hüt, am 21. Hornig, zoobe churz nach de siibne.

Hutzgüri & Co.