Am Freitagabend ziehen unheimliche Gestalten durchs Dorf

Am Frytig, em 13. Hornig, wird ich, s Hutzgüri, zämme mit em Schärmuuser, em Bott und myne beeden Äierwyybli zum föifedryssigschte Mool in der jüngere Gschicht vo Rotheflueh es paar Wyybervölcher und Bürschtli im Dorf under dr Rote Flueh mi Uffwartig mache. Öbben um die Siibeni falle mir vom Weschte häär ins Dorf yy und marschiere schnuerstraks ufe Dorfplatz zue. Dört wäi mer emol luege, wär vo dene Rotheflüeher, wo nit bsuecht wärde, der Muet het, em Güri under d Auge z drätte.

Als erschts gönge mir uf em Brüggli übere Leisibach zum Thomas. Näi, so berüehmt isch er noonig, as der Bach nach ihm benennt worden isch, für daas het sy Uftritt am Jasstisch vom Sven bim Schwyzer Färnseh noonig glängt. Bim Metzger im Leisi-Ränkli gits ämel sicher öbbis Guets Gräukts. Oder müese mirs eus ächt emänd no sälber neh, wie d Chunden in der Metzg z Zunzge sit Neuschtem.

Wyter goots d Hirschegass duruuf zum Schmirgel zwoo, au bekannt als Aicha Remischberger. Sie het eus läider nit an ihre Eröffnigsapéro yyglaade. Das het eus also scho e chly mööge, aber villicht isch jo non e Guttere reserviert fürs Güri. Der Läiterewaage vo den Äierwyybli hätti wider emol e Service nötig. Neui Gummischläppe würds au no verträäge und rächti Brämse, as eus der ganz Karsumpel nit wider fascht s Loch durab goot.

Jetzt gönge mir «im Hof» ufe. Vom Marianne Röhm wäi mir wüsse, wies eso gsii isch, wider in Chindergarte im äigede Dorf zrugg z choo. Mir hoffe, ass sie denn au ummen isch, wenn mir uf Bsuech chömme. Vor 30 Joor häi sii und der Fritz jo nit eso Freud ghaa am Güri und sym Gefolge. Mir hoffe, ass mir daas Mool käi Schimpfis überchömme.

Im öltischten Egge vo Rotheflueh wäi mir mitem Bracher Heiri go aastoosse. Scho 30 Joor ischs här, sit mir ihn s letscht Mool bsuecht häi.

Eus isch z Ohre choo, ass är jetzt äin vo den öltischte Rotheflüeher isch. Der Bott würd gärn e Schluck vo sym Wasser probiere. Das cha jo nume guet syy.

Der neu Gmäinipresidänt Cleto Cudini isch der nöggscht uf eusere Lischte. Er isch nit z verwächsle mit em Zauberer Houdini. Obwohl die politischi Laag z Rotheflueh mängisch au enere Zauberei glyycht. Doo wärde Gmäinrööt aane- und wider ewäggzauberet, bevor me rächt cha luege. Der neu Gmäinipreesi het in eusem Dorf e rasanti politischi Karriere aanegläit.

Nochär bsueche mer der Roland Rieder an der Wittnauerstrooss. Bis ärs zum Föif-G-Antennewart brocht het, het er e chly Geegewind müesen uushalte – es hätt fascht für es Windchraftwärk glängt. Und der äint oder ander isch allwä froh, as dä GGGGG-Pfoschte ame hinder der Rauchwulche vo der Gmäinihäizig versteckt isch. Villicht bruucht s Hutzgüri no neui Stolle, es syge jo schyynts die beschte vo der ganze Region.

Als nächstes gehen wir zum
Bernd Huber und wollen kontrollieren, ob er alle Einbürgerungsfragen erfolgreich hat beantworten chönnen. Nänäi, är wohnt jo scho lang doo und wird wohl eusi Sprooch verstoh. S Güri gratuliert em Bernd zu sym schöne neue Bürgerort. Mir wäi ihn druf ufmerksam mache, as men als Bürger nit nume Rächt, sondern au Pflichte het – es weer sicher s äint oder anderen Ämtli z haa.

Nocher marschiere mir Richtig Unland hindere zum zwääg gmachte Talärnschte-Huus. Allwä cha d Corinne Wyss fascht ganz Rotheflueh versorge mit ihrem neue Solar-Chraftwärch, und ihri schöni Huusfassade strahlt bis ins Oberloch ufe. Sii schwingt no gärn ihre Chochlöffel in der Turnhalle. Mir hoffe, ass sii wäiss, wie me s Güri mues besänftige. Es weer nämlig chäibe schaad, das schöne neue Dach abzdecke.

Nach zwölf Joor im gemäine Root göi mir hüür s letschte Mol der Patrick Vögtli go bsueche. Er het sy Rücktritt ungärn gee, aber er het by eus im Bann käis Fläckli Land für sys Blockhuus gfunde. Er het aber unbedingt wider en äigedi Stääge wette, drum zieht er jetz uf Wägestette. Villicht chan er dört au als Seckelmäischter kandidiere und syni politischi Karriere wyterfüehre. Mir sy gspannt ufs Abschiidsgschänk ans Güri.

So, das weeren also die Frauen und Manne, wo mir d Ufwartig mache. In der Zwüschezyt sött sich ummegsproche haa, ass me denn joo nit mit leere Händ sött doo stoo, wenn s Hutzgüri chunnt. Mit edle roote Säft, Brautem, Brenntem und Gräuktem loot sich s Güri am schnällschte besänftige.

Und dir wüsset jo: Öbs huudlet oder Chatze haaglet – s Hutzgüri blybt immer voruss. Also denn, bis am 13. Hornig, zoobe churz nach de Siibne.

Hutzgüri & Co.