Sissech | Nach Zunzgen möchten auch die Sissecher beweisen, dass sie ein Jubiläum zu feiern wissen

Sissech fyyrt 800 Johr,
uss däm Grund nimmt me sich vor:
Dorffescht geebs im Fall e käis.
Derfür träumt en illuschtre Kräis,
me chönn s Johr duure wandere
vo äim Highlight zum andere.
Als «Primör» zäige mir euch doo,
wie das chönnti uusechoo:

E Freifahrt uf der Gäischterbahn
mit Gesi-Breesi Christine Tschan.
Der Zemp chunnt mit sym Örgeli,
vertrybt dir dyni Sörgeli
ganz exklusiv bi dir dehäi –
Und d Müüs, die flüchte von eläi.
Vom Bluemethal e Määrli-Stund.
Vorusgsetzt, dass är denn grad chunnt.

Jeede macht, was ihn grad gluschtet –
egal, öb’s Spass macht oder fruschtet.
Was allerdings scho sicher isch:
Der Frauebanndaag isch vom Tisch.
S Chluuri, s erscht Mol ohni Bruscht,
wird ertränkt am erscht Auguscht.
Und d Schütze, zum das Dörfli schütze,
nützen ihri Wassersprütze.

Der Kevin schänkt e Stund lang Schwyyge,
der Zemp, dä stryycht drzue no d Gyyge.
D Frau Regez tanzt mit dir e Tango,
dä Tango, jo, dä chönnti lang go.
Der Boxclub spiilt der Fauscht vom Goethe,
der Zemp Schiwago uf der Flöte.
Der Schiessveräin isch muff, drumm will er
kontere mit Tell vom Schiller.

Der Heiner schryybt käis Buech das Johr
und rappt derfür im Chillechor.
Guets z Ässe git s bim Räberli:
Mit Wysswyy gspüelti Läberli.
«Chumm zuenys», wirbt das Johr au d Chille,
«chasch z Sissech niene besser chille.»
Au d «Volchsstimm» steckt sich in däm Wahn aa,
si chunnt äis Johr als Ikebana.

Der SV plant e Maskeball,
der TV hilft grad überall.
Und ZS füehrt e Glacestand.
Nur d Maya stoht ganz still am Rand.
Der Fraue-Klub frogt aa, ob s rächt syg:
Wiehnechtsfänschter mol 365.
Was bietet öis der Jagdveräin?
Das intressiert, wäiss Gott, käis Schwäin.

Au d Muusiker mitsamt de -inne
löje d Uniform im Chaschten inne.
Nach Hiphop tönts statt flotte Märsch.
Me schwänkt drzue die flotte – Ärm.
Sy häi no d Schütze schnäll erwäicht,
z zäige, wie me d Noote bräicht.
Der MV wäiss, dass alli toobe
bim Hochzytsmarsch in Herschbärg oobe.

Me muess jo doo nid gross erwähne,
dass villi für das Fescht nid fääne.
Der TV dänkt scho an e Pause
und züglet d Wettkämpf flugs uf Lause.
S Museum, ghört me, plant scho still,
was äs denn s ganz Johr zäige will:
«Gelterkindens schönste Orte –
ohne Bilder, ohne Worte.»

Der Schachklub säit, dass das nid glatt isch.
Sii zieje s vor, wenn alles matt isch.
Chasch Schrüübli schruube links bim Muff,
und rächts, do füehrt der Pfaff es Puff.
D Frau Torpus molt live in der Cheesi,
drnäbe chasch dir vom Varesi
es Bildli vo der Gmäinrootsspitze
gratis lo uf d Stiirne ritze.

D Gärtner brooten anstatt Gmües
zum Brunch für alli Wolf am Spiess.
Und wenn denn alli gmüetlig sitze,
müese Turner neui Spiessli spitze.
Der Thommy Matter, e Migrant,
wünscht us em Zürcher Oberland:
«Dir alles Guete, Sissech, und vill Glück.
Hab keine Angst, ich komm’ nie zurück.»

Im Dorf verzellt der Mazzucchelli,
wien är die Zahle zämmezelli.
Zu sich häi ladet d Frau Grazioli –
jo, d Schwöschter vo däm Handball-Goalie –
fescht gfruschtet Fründinne und Fründe,
zum die Sänkrächt-Grüene z gründe.
Derzue serviert si öppis z Bysse.
Zum Trinke gits e gsprützte Wysse.

Mit 60 dur e Strichcode fahre,
der Zemp, dä zupft drzue d Gitarre.
Es Johr lang Trubel, Gaudi, Gspass –
und Zunzge wird vor Nyyd ganz blass.
Sy sääge, Sissech fyyri gewaltig,
me miech denn s Glyych, wenn me so alt syg.
Nid z vergässe isch als Schlager
grad vor der KESB es Pfadilager.

«D Fasnecht wird in Mäi verläit
und füehrt uf d Flue», het d FG gsäit.
Bis denne müess sy äifach hoffe,
d «Sunne» blybi so lang offe.
Denn spiile d Windlefurzer Harfe,
und d Guggä-Rugger drääge Larve.
Es git im Cheesmeyer sym Garte
e Daag lang Kebab ohni z warte.

Es butze, ohni sich gross z wehre,
d Wandervögel d Voliere.
Egal, wär wo und wenn sys Äi läit,
der Gmäinibreesi nennt s es Highlight.
Drum verspricht der Buser Peter:
«Zum Zelle bruucht s e Höhemeter.»
Me feschtet, wie me z Sissech läbt:
Konzäptlos luttet dört s Konzäpt.

euche Neofütt

Und dir chömet em Neofütt au nid dervoo …

An d Flue
Do stuunt er grad, der Buser Peter:
E Plaane sächs mool nünzäh Meter.
Do hänke d Zunzger, nundefahne,
an syni Flue e Fahnen aane,
zum Sissech under d Naase ryybe:
«Au z Sissech-Süd cha me jetz schryybe.»

An der Schuelwand
Im Tannebrunn es riise Gschrei:
«Scho wider so ne Schmiirerei!»
Me luegt, dass alles schnäll verschwindet,
bevor d Kitty es Projäkt erfindet.

Begeegnigszone
Vo rächts ins Dorf und denne halte,
der Blinker links und abeschalte.
Ab der Mitti, wirsch s denn gseh,
gits, glaub, käini Regle meh.
Dys Auti in der Mitti länke,
de Lüt es fründligs Lächle schänke.
Und halt denn numme schön brav d Schnuure,
pfyfft e Velofahrer duure.
Vercheert dys Auti aanestelle,
im Caprice schnäll e Kaffi bstelle.
Nach em Zahle, das isch s Dumme,
gilt s Äibahn-Regime anderscht umme.

Z Gälti
Der Gröfli findet s nümme toll,
het nach vier Johr scho d Nase voll.
Drey hören uff, vier sy beräit.
Halt äine z vill, das tuet ys läid.
Am Schluss gits denn drey Günner,
für äin wird Luft halt dünner.

Fusione, wo lohne
Worum fallt käim uf deere Wält yy:
E Fusion vo Zunzge und Gälti?
Bi deene weer doch garantiert,
dass käin vo bäide profitiert.

Bim Metzger
Der Otti, wo im Laade stoht,
bstellt Zimmerli, zwöi Entrecôte,
drüü Chalbsfilet, vier Schnitzeli,
vum Schinggespäck e bitzeli.
Bim Zahle spöter an der Kasse
do säit dä Maa, do müess är passe.
«In vier, fünf Johr», verspricht der Otto,
«der Nusshof läbt au nach däm Motto.»
Und är säit, dass näbem Sälti
s Glyyche no für Gälti gälti.

Bi de Wahle
Und wenn mir scho grad derbyy sy:
Zwee Glatzchöpf, Lauber und der Yysi,
die dörfe nach de letschte Wahle
mit de mäischte Stimme prahle.
Am Schluss denn bin y böös verschrocke:
Öis Wehler cha käi Locke locke.

Am Schwingfescht
Zum Wäber säit der Toni Lauber:
«Wie goht das Thommy, ohni Zauber,
es Defizit z verschwinde z bringe?
I guub vill Gäld, würd mir das glinge.»
«Wäisch», säit der Wäber, «s git e Kniff.
Mir Schwinger kenne ganz vill Griff.
Will ich im Stall z Buus Schöfli scheere,
und äis duet dumm, will sich beschweere
und muule oder süscht e Furz.
Denn nimm y s midemene Churz.»

Am Latärnepfoschte
Der Hund darf z Oobe no schnäll Gassi
und dänkt, die Regez oobe spassi.
Si sägi, was är dänki? «Näi!»
Er stoht nööch aane und hebt s Bäi.