Zentrum/Ringsum | Allerhand Verse vom Neofütt, die allerhand sind

Sissech

Dr Gieri
Dr Gieri säit, nur Kommissione,
wo nid taage, würde lohne.
Und y ha mer überläit:
Het ärs würklich so churz gsäit?

Zahnweh
My Zahni säit: «Um Gottes Willa,
dy Schnuure isch e Tschudy-Villa.»

D Sunne
Ändlich isch die Sunnen offe.
Dört wird diniert und nümme gsoffe.
Der Buser bittet d Linsalata:
«Schlepp mir Bier und Wurschtsalat aa!»

D Sunne-Gescht, das isch der Bescht,
glauben am Eröffnigsfescht,
dass es jetzt Champagner räägnet.
S isch nur e Pfaff, wo s Dessert säägnet.
(Es häigi gschmeckt – lut Hansjörg Dääge,
doch syg das nid am Sääge glääge.)

D Wätterfrösch häi s letscht Johr gfunde,
es häigi vill zvill Sunne-Stunde.
Do het denn der Michele gfunde:
«Derfür vill z weenig Sunne-Chunde.»
Am Prattler Schwingfescht fehlts wie immer
an gnüegend freie Hotelzimmer.
«Keine Zimmer, tut uns leid»,
häi sy in der Sunne gsäit.
Und mängge het sich überläit:
«Beläit – oder ächt nid beräit?»

Violetti Zone
E Veloflicker, nid maskiert,
het offebar fescht provoziert.
Är mäint, wenn är sich müesst maskiere,
würd är jo sys Gsicht verliere.
Drum het är schliesslich, so wird brichtet,
Gittersteeb statt Späiche gsichtet.

Nomol dää
Wysoo muesch ihn denn ums Verrecke
e Daag lang grad in d Chischte stecke?
Die Stroof isch doof. Me chönnt brobiere,
ihn e Nacht lang lo serviere.
Zum d Stroof verscheerfe: in sym Fall
z Wäisligen am Maskeball.

Nachtkaffi
Der Mosimaa, und denn isch’s gscheh!
Vom Bobby isch das s Schlussbouquet.
Es isch nümm gsund, säit er und lacht,
im Alter no z vill Kaffi z Nacht.

Schütze-Jubileum
Die ballere sit zwöi Johrhundert.
Das git es Fescht, was käin verwunderet.
Der Fraueverein muess sehr lang dänke:
Was wäi mir deene Schütze schänke?
200 Helm zu der Glückwunschcharte.
Falls d Fraue mit em Wahlholz warte.

Die ballere sit zwöi Johrhundert.
Das git es Buech, was käin verwunderet.
Der Ueli schrybt’s trotz aller Gfohr,
dass s vier, föif Syte git pro Johr.

Die ballere sit zwöi Johrhundert.
S git neui Chläider. Bisch verwunderet?
Da’sch d Muusig, stopp, ich Chueli.
Der Taktstock schwingt au dört der Ueli.

D Bundesröötene
Wenn dä Berset doch no goht,
ghört d Maya doch in Bundesroot.
Si würd denn ohni z zaudere,
der «Volchsstimm» d Ghäimnis plaudere.

Öise Regierigsroot
Der Isi nimmt der Wahlkampf easy.
Er rüeft zum Drink, do muesch derbyy sy.
«Wahlbar» häisst’s. Du froggsch am Tisch,
ob «Wahlbar» s glyych wie «weehlbar» isch.

Öisi Gmäinröötene
Säss s Carol nid in deere Horde,
weer das Septett männlich worde.
Nimmsch der IQ und Verstand,
häi d Fraue scho lyycht Oberhand.

Öisi Landröötene
Jetz het sy gnueg, jetz macht sy Schluss.
S Regine isch im Landroot duss.
Wie isch das gsii mit ihre dinne?
Wär cha sich do no richtig bsinne?

Mundart
Häisst’s chlyyner oder chläiner, Heiner?
Wär redt Mundart räiner? Keiner!
«Chummlig», «gattlig» und «Gragööl»,
das isch für öisi Mundart s Öl.
Mir sääge Sätz und saage Holz
und sy uf «Louel», «Ziife» stolz.
De Bebbi het är das erklärt.
Doch deene isch das nüt me wärt.
Und wenn men e Bilanz will zieh:
Verstande häi die öis no nie!

Volchsstimm
140 Johr git s die Zytig am Zyschtig,
Dunnschtig und am Frytig.
Bim Lääse chunnt’s äim öppe vor,
d Bricht stammen us em Gründigsjohr.

Üsser-Sissech

Vo Buus bis Buebedorf
Der Wäber, der Regierigsroot,
dä säit, dass är der Root verloht.
Denn ihre Thomas, häisst’s vo Buus,
dä lyydi halt am Schwingfescht-Blues.
Er möchti drum ins Bundeshuus,
grad wie di nöii SP-Frau.
Schwarznase-Schööfli häig är au.

Wär z Lieschtel ihn ersetzt, wäiss gnau:
Mit ihm goht’s dickschte Dossier au:
Är blybt uf Schwingfescht-Schulde hocke.
Drum würd’s die rooti Locke locke,
meh Farb in die Regierig z geh.
Doch s Volk het’s denn halt andersch gseh!

Z Sissech wirbt e Sächser-Gruppe
mit Übernaame Gärschtesuppe
und, me gspüürt’s, e bitz in Not:
«Gieri for Regierigsroot.»

Gälti
Der Gmäinroot schrybt per Inserat:
«Uns fehlt grad kein Gemeinderat.»
Das findet der Urs Dünner schaad.
Är weeri drum jetz grad paraad.

Gälti zum Zwöite
«Scho früeh het öises Gwärb vill gschafft,
Und zäigt, was goht us äigner Chraft.»
«Herr Lehrer», froggt do druf der Walter,
«schwätze Sii vom Mittelalter?»

Wäisnidlige
D Kunschtwält isch begäischteret,
was d Ursi Pfischter chläischteret
und usstellt zmitz in der Natur.
Im Gwächshuus: Da’sch Kultur ganz pur.
Der Blick entzückt, weckt Luscht, Empfinde –
wenn d Bilder denn emol verschwinde.

Herschbg
D Fusion mit Arschdorf goht nid wyter.
Herschbg stoppt, um d Eh stoht’s schyter.
Y glaub, die würde sich nid schäme
und spanne grad mit Magde zäme.
Und freue sich scho jetz wie wild
uf ihres AG-Numm’reschild.

Häfelfinge
Äim wird die Japan-Fliege z dumm,
är sagt drum alli Chiirsbäum um.
Würden alli ihri Bäum abhaue,
Chönnt d Florence dä Naturpark baue.

Tännlige
D Comeedi um e liebe Gott
isch nid, was s Bätschers Sandra wott.
Sy säit: «Jetzt tritt y
byy bi der Mitty.»
D EVP isch böös bedrüebt
und zäigt, wie sii die Nöchschte liebt.

Nonemol Tännlige
Der Chaschper het dört z Sissech unde
ganz e nöii Arbet gfunde
und s Chaufhuus zum Kulturhuus gmacht.
Dort schafft är jetzt, häisst’s, Daag und Nacht.
Nur mänggisch gsehsch en häimewetze,
zum dört der Chillehüübel bsetze.

Hölschte
In Hölschte trifft s bim WB-Start
grad die nöiie Wäiche hart.

Mini-Macho-Dorf
Lueg die Haltstell! Gsehsch die Wääge?
Y find, die WB isch e Sääge.
S Eröffnigsfescht isch s Maximum –
und y styg in e Ersatzbus um.

Lieschtel
Bim Staat will me, zum Chöschte spaare,
s Liecht und d Weermi aabefahre.
Vill gscheiter weer, me spaart meh Gälder:
me installiert Beweegigsmälder.

Sissech Süd/ Holliwud

S git Dörfer, die häi nid vill z lache,
und löie drum e Film lo mache:
«Was in Zunzgen alles geht»
der Räiie noch im Alphabet.

Der Adrian mit der Pischtole
wäi sy drum as Erschte hole.
Sys EM-Gold, dänkt me dört hinde,
das wird rundumme Yydruck schinde.

Bim B häi sy sich sofort bsunne
an Büchelbärg vo deene Hunne.
Dört liggi, schyynts, e grosse Schatz.
Der Bemag blybt dr zwöiti Platz.
Do frogt der Erscht am Gmäinrootstisch,
wie wyt s bis Z wie Zunzgen isch.

Bim C scho runzlen alli d Stirne,
es chäibe Züüg für Zunzger, z hirne.
D Idee, wo rettet, het der Breesi:
«Mir gönge z Sissech gschnäll in d Cheesi
Und sääge deene, s würd ys fröie,
wenn sy ys churz das Chluuri löie.»