Hans W. vo Neofütt

Wär radlet so spoot dur Nacht und Wind?
Es isch dr Isi mit Fürz im Grind.
Im Arm hebt är e wirre Plan,
dört druff stoht sicher: Velobahn.

«My Thomas, was birgsch so bang dy Gsicht?»
«Gsehsch denn nonig die Zyttigsbricht?
Die Bricht, wo öis in d Pfanne haue?»
«Das stoppt ys nid vom Bahne baue!»

«Du liebe Tom, chumm, syg käi Penner.
Die Velo-Bahn, die wird der Renner.
Die prächtig Bahn, wirsch gseh, lobt jeede,
und käin wird vo dym Schwingfescht reede.»

«Hee Isi, die Bahn, hesch es verstande,
die raubt ys d Vernunft, sofärn vorhande.»
«Syg ruehig, blyb nume ruehig, mon frère.
Du dänksch jo süscht au ganz gärn quer.»

«Willsch, liebe Thomas, nid scho jetze
dir vor dym Fescht es Dänkmool setze?
Der Chlaus und der Häring sy fix derbyy,
die singen und tanzen und lullen öich yy.»

«My Isi, my Isi, isch s nid doch e Furz?
Je höcher d Bahn, desto tiefer der Sturz.»
«My Tom, my Tom, ich säg dir s diräkt:
Mir schaffen es bahnbrächends Projäkt.»

«Für d Hochbahn bruuch i dy Sääge bald.
Und bisch du nid willig, denn bruucht s, Tom, halt Gwalt.»
«He Isi, he Isi, jetzt het s my au packt.
Die Bahn wird boue, süscht häi mirs verkackt.»

Der Isi isch häppy, är radlet jetzt gschwind.
Im Chopf drüllt sy Plan, das ächzende Chind.
Är hofft, dass d Hochbahn scho glyy stoht.
Är schnallt vill vill z spoot: Sys Chind isch scho dot.

PS.
Der Thomas säit zum Isi:
«Lo my au lo derbyy sy.»
Der Rääber sait zum Wääber:
«Du bisch e rächte Sträber.»