Jeedes Joor das glyyche Ghetz,
und jeedes Joor säisch, ass daas jetz
würklich s letschte Mool gsii syygy,
ass du mit däm Gschänkli-Byygy -

Chaufe wartisch bis zum Schluss.
Die Luft syg jetz ändgültig duss!
S nöggscht Joor söll daas nümm bassiere,
ass me däwäg müess bressiere …

Esoo häigsch gar nüt vo däm Fescht
und s weer allwäg würklich s Bescht,
me würd die ganzi Sach mit Schänke
äinisch gründlich überdänke …

Me chönnt meh Zyt haa für enander
statt däm gstresste Duurenander.
Übrigens – für s nöggschte Joor:
Was nähmet Diir Öich alles vor?
Äigebröödler*

*Der Äigebröödler, der Hauspoet der «Volksstimme», macht sich einmal in der Woche seinen Reim auf ein aktuelles Ereignis.