E Schwetti «Good News»

«Jetz muess i dämfall wiidermol d Fänschter putze», hani dänkt, wo si d Wiehnachtsbelüüchtig aagworfe häi. Die Stärnen über der Hauptstrooss häi my Stuben uf ei Tätsch in e Solarium verwandlet. Der Dräck uf em Fänschter het sich im beschte Liecht präsentiert, und my Zimmerlampen isch per sofort arbetslos gsi. I ha sen in stromspaarende Füüroben entloo, bi wiider aneghockt und ha uf d Wält abegluegt, wo in Form von ere Zytig vor mir uf em Tisch glägen isch.

Mit jedem Satz, woni gläse ha, ischs es bitz chelter worden in der Stube (und das trotz em Fluet-Liecht vo dusse). Zerscht het d Zimmerpflanzen ihri Bletter verlore, denn hets überall Yys-Krischtall gee und wo der Tee in der Tassen yygfroren isch, hani d Zytig schnäll wiider zuegmacht. Es schneit tonnewys schlächti Noochrichte, das glaubsch gar nid. Und grad in der Wiehnachtszyt weer doch wiider mol Zyt für gueti Noochrichte. I bi schlotternd am Stubetisch ghockt und ha mir überleit, was das Johr alles so passiert isch uf dere Wält. Leider isch mer fascht nüd in Sinn cho, wo mi würd in Wiehnachts-Stimmig katapultiere.

I ha d Zytig dervo gschosse, der Laptop ufklappt und uf Google «Good News 2022» yydöggelet. Und siehe da: Do isch doch tatsächlich au Guets passiert. As Erschts hani usegfunde, ass Forschendi usegfunde häi, ass Lüt, wo optimistisch sy, bis zu 4,4 Johr lenger läbe. Optimistisch hani wyter googlet: D «EU» het in däm Summer so vill Solarstrom produziert wie no nie, z Indonesie wird immer weniger Rägewald abgholzt, z Paris isch der Vogel-Märt sit däm Johr verbotte, z Slowenie isch d «Ehe für alle» legalisiert worde, dank verschiidene Massnahme sy Thunfisch nümm vom Usstärbe bedroht, und z Spanie häi im Summer Fuessball-Schiidsrichterinnen erfolgrych für meh Lohn gstreikt: Si verdiene jetz 1666 Euro pro Spiil, anstatt nur 320.

I ha das alles gar nid gwüsst und bi voll in «Good News»-Strudel yyne cho. Irgendwo uf em Grund hani no folgendi Gschicht entdeckt: Z Russland het e Doppelgänger vom Selenskyj gläbt. Eine, wo dermit Gäld verdient het, ass er genau glyych usgseht wie der ukrainisch Presidänt. Wäg em Chrieg het är us offesichtliche Gründ müesse flüchte. Das het er aber numme dank der Hilf vom e Doppelgänger vom Putin und eme Doppelgänger vom Kim Jong-Un gschafft. Das muesch go google.

Woni spoot znacht us däm Strudel uftaucht bi und der Laptop zueklappt ha, hani gmerkt, ass d Wiehnachtsbelüüchtig abgstellt het. In der Stuben ischs stockdunkel gsi. Derfür häi d Fänschter wiider suuber usgseh. Als weere si blitzblank. «Wenn der Dräck nid belüüchtet wird, denn gseht men en au nid», hani dänkt und derby d Zytig zämmegläse. Numme verschwinde duet är wäge däm ebe glych nid. Und drum hets irgendwie guet do, woni zmitz in der Nacht d Fänschter mit dene Zytigs-Syte putzt ha. Und zwar so suuber wie no nie.

Dominik Muheim ist in Reigoldswil aufgewachsen und lebt in Liestal. Er ist freischaffender Kabarettist und Slam-Poet. Er ist Poetry-Slam-Schweizer-Meister 2017 und gewann im selben Jahr den Baselbieter Kulturpreis.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title